Digital fotoutstilling

Den Trondhjemske postveg – digital fotoutstilling

Denne digitale fotoutstillinga er laga i samarbeid mellom Den Trondhjemske postveg og fotostudentar ved Høgskulen i Volda. Utstillinga byggjer på feltarbeid ved Ljøen i Hornindal, der studentane utforska og fotograferte delar av den gamle postvegen og landskapet rundt tidleg på våren.

Årstida sette sitt preg på arbeidet: landskapet var framleis prega av vinter og fukt, med nakne tre, spor av slitasje og skiftande lys. Dette gjorde fotograferinga både utfordrande og interessant, og gav rom for å utforske postvegen som eit landskap i overgang – der tid, vêr og bruk har sett tydelege spor.

Med utgangspunkt i lokale forteljingar og kunnskap om staden har studentane dokumentert spor etter ferdsel, handverk og tid. Gjennom fotografi viser utstillinga møte mellom natur og kulturspor, lys og vêr, materialitet og detaljar i landskapet. Utstillinga inviterer deg til å sjå nærare – og gjerne til å oppleve postvegen sjølv, til fots og i eige tempo – og til ulike årstider.